Deputeti i zgjedhur i Partisë Demokratike në Lezhë, Agron Gjekmarkaj ka deklaruar se opozita nuk duhet të bojkotojë Kuvendin, pavarësisht se kreu i PD, Lulzim Basha i ka cilësuar zgjedhjet e 25 prillit si masakër zgjedhore.
I ftuar në emisionin “Open”, në Top Channel, Gjekmarkaj tha se të gjitha rrugët e tjera që shkojnë kundër futjes së opozitës në Kuvend, kontribuojnë në asgjësimin e pluralizmit, ndërsa shtoi se ka bindjen se Basha nuk ka për të bërë një zgjedhje të tillë.
“Nuk duhet bojkotuar Kuvendi se nuk duhet lënë bosh ai vend atje dhe nuk duhet dhënë asnjë minutë kohë për t’i nxitur shqiptarët. Çdo rrugë tjetër është asgjësim i pluralizmit, nënshtrim dhe unë nuk kam ndërmend ta pranoj dhe kam bindjen se Basha apo PD nuk do pranojë ndonjë rrugë tjetër”, tha Gjekmarkaj.
