Katër nën akuzë për korrupsion se lobuan në BE për Botërorin e Katarit

Zv.presidentja e Parlamentit Evropian Eva Kaili është liruar nga detyrat e saj lidhur me një hetim nga prokuroria belge që ka të bëjë me akuzat për lobim nga një vend i Gjirit Persik në PE.

Katër personat akuzohen se janë pjesë e një grupi kriminal, për pastrim parash dhe korrupsion në lidhje me një hetim për ndikimin nga një vend i Gjirit Persik në parlamentin e Bashkimit Evropian, tha të dielën zyra e prokurorisë federale belge.

Skandali i lobimit, i cili dyshohet se përfshin zyrtarë të Katarit, ka parë tashmë zëvendëspresidenten e parlamentit Eva Kaili të liruar nga detyrat e saj.

Të katër janë në mesin e gjashtë personave të mbajtur për t’u marrë në pyetje pasi policia belge nisi të premten bastisje në të paktën 16 ndërtesa në kryeqytetin Bruksel. Asnjë nga të arrestuarit nuk u emërtua, por të paktën njëri është anëtar i Parlamentit Evropian dhe një ish-deputet i BE-së. Dy të tjerët u lanë të lirë.

“Dyshohet se palëve të treta në pozicione politike dhe/ose strategjike brenda Parlamentit Evropian ju anë paguar shuma të mëdha parash ose u janë ofruar dhurata të konsiderueshme për të ndikuar në vendimet e Parlamentit.” – thanë prokurorët në një deklaratë.

Autoritetet nuk e kanë identifikuar emrin e vendit të Gjirit për ofrimin e parave ose dhuratave për zyrtarët në parlament në këmbim të favoreve politike, por disa anëtarë të asamblesë dhe disa media belge e kanë lidhur hetimin me Katarin.

Në një deklaratë në Tëitter, Ministria e Jashtme e Katarit tha se vendi ‘kundërshton çdo përpjekje për ta lidhur atë me akuza për sjellje të pahijshme. Çdo lidhje e qeverisë së Katarit me pretendimet e raportuara është e pabazë dhe e keqinformuar rëndë’.

Prokurorët thanë gjithashtu se shtëpia e një ligjvënësi të dytë të BE-së u kontrollua të shtunën në mbrëmje. Presidentja e asamblesë, Roberta Metsola, u kthye në Bruksel nga shtëpia e saj në Maltë për të qenë e pranishme gjatë kontrollit të shtëpisë, tha zëdhënësi i saj.

Ligji belg kërkon që presidenti i parlamentit të BE-së të jetë i pranishëm në rastin e bastisjes në shtëpinë e një anëtari të zgjedhur, i cili në shumicën e rasteve ka të drejtën e imunitetit parlamentar.

“Parlamenti Europian dhe presidentja Metsola qëndrojnë me vendosmëri kundër korrupsionit, po bashkëpunojnë në mënyrë aktive dhe plotësisht me organet e zbatimit të ligjit dhe autoritetet gjyqësore për të ndihmuar në rrjedhën e drejtësisë”, tha zëdhënësi i saj. Ai nuk pranoi të japë detaje të mëtejshme.

Asambleja e BE-së fillon të hënën seancën e fundit plenare të vitit në Strasburg të Francës.

Metsola liroi nga detyra Eva Kailin, një ish-prezantuese e lajmeve televizive greke 44-vjeçare, të shtunën vonë, ‘nën dritën e hetimeve gjyqësore në vazhdim nga autoritetet belge’.

Kaili gjithashtu u pezullua nga partia e saj në Greqi, PASOK dhe grupi socialist e demokrat i asamblesë së BE-së të premten pas bastisjeve, në të cilat policia sekuestroi gjithashtu rreth 600,000 euro, pajisje kompjuterike dhe telefona celularë.

Partia e Kailit në Greqi, Lëvizja Socialiste PASOK për Ndryshim, u distancua publikisht nga komentet që ajo bëri në parlamentin e BE-së muajin e kaluar duke lavdëruar Katarin, i cili aktualisht po pret botërorin e futbollit.

Ajo tha se Kupa e Botës është ‘provë, se si diplomacia sportive mund të arrijë një shndërrim historik të një vendi me reforma që frymëzuan botën arabe’. Kaili përsëriti gjithashtu atë që ajo tha se është një pikëpamje e Organizatës Ndërkombëtare të Punës se ‘Katari është një udhëheqës në të drejtat e punës’.

Në Itali të shtunën, ‘Neni Një’, një parti e vogël e qendrës së majtë, pezulloi ish-ligjvënësin e BE-së Pier-Antonio Panzeri pas raportimeve se ai ishte kapur në skandal. Bashkëshortja dhe vajza e tij janë vënë në paraburgim pas një urdhërarresti europian.

Ata kaluan disa orë në paraburgim përpara se një gjykatë në Brescia urdhëroi transferimin e tyre në arrest shtëpiak në pritje të një vendimi përfundimtar nëse do t’u dorëzoheshin autoriteteve belge, tha të dielën një nga avokatët e tyre, Angelo Giovanni de Riso.

Ai i identifikoi klientët e tij si gruaja e Panzerit, Maria Dolores Colleoni dhe vajza, Silvia Panzeri.

Në një intervistë telefonike, de Riso tha se dokumentacioni i plotë nga Brukseli nuk kishte mbërritur ende, kështu që ai nuk i dinte akuzat e sakta me të cilat përballeshin. Por ai tha se besonte se kishte lidhje me akuzat për korrupsion dhe pastrim parash. Ai tha se ishin të pafajshëm.

Konfederata Ndërkombëtare e Sindikatave nuk pranoi të komentonte të premten kur u pyet nga Associated Press në lidhje me raportet se sekretari i saj i përgjithshëm, Luca Visentini, ishte gjithashtu i përfshirë në këtë aferë. Një mesazh në faqen e internetit të organizatës të dielën tha se ‘ITUC nuk ka asnjë koment të mëtejshëm për këtë çështje për momentin, në pritje të informacionit të mëtejshëm’. HASHTAG.AL